Main » 2009 December 20 » Pidato Pasambahan ( Mambaka Kamanyan )
21:02:03 Pidato Pasambahan ( Mambaka Kamanyan ) | |
Pangka : Baliau datuak ...... Ujuang : Manitah lah Datuak ..... Pangka : Ito mah sambah nan ka dipulangkan ka bakeh Datuak, dek niek silang nan bapangka karajo baiek nan bapokok, di hari sahari kini hari baiek kutiko elok, mulo kaki kadilangkahkan aso tangan ka dijambokan cukuik jo sayarat dengan rukun sarato pakakeh pangarajoan Elok di pakai jo mupakek buruek di buang jo rundiangan. Kamujuran dek silang nan bapangka, nan di tunggu alah datang, nan dinanti alah tibo. Kamujuran dek si alek jamu, tibo lah disingkokkan pintu duduek lah babantangkan lapiek. Limbak nan dari pado itu, aka tumbueh pikiran tibo, timbuek sarupo iko kini, lah tibo pulo api jo kumayan di haribaan ambo, pitua juo ambo nan ka dibari mah Datuak .... Ujuang : Lah ukue sampai Datuak .... Pangka : Bilang Sakiro itu lah Datuak .... Ujuang : Bana pulo tu mah sapanjang panitahan Datuak nan ka tangah, nan panitahan dari ambo pendek sajo ko mah Datuak, nan bak mamang urang tuo kito Ayam hitam si rambun hitam Tapawik di halam dapue Makan tarulang ka talago Mangakeh mancari makan Kok lah tibo api jo kumayan Pasanglah niek dengan kawue Nak mandoa angku guru kito Nak sampai niek sapangkalan mah Datuak ..... Pangka : Lah ukue sampai Datuak .... Ujuang : Bilang Sakiro itu lah Datuak .... Pangka : Indak lai do, dang dikatokan lah dapek pulo ambo aie nan satitiek, rantiang nan sasakah, lah baiek manyanang hati ambo. baa toh hanyo, ka ambo palalu sakali ko mah Datuak ...... Ujuang : Baitu molah Datuak ..... Pangka : Maa Baliau Datuak ...... Ujuang : Manitah lah Datuak ..... Pangka : Dek niek silang nan bapangka, karjo baiek nan bapokok, karoakok nan bajunjuang. Samaso alun barabalaun, bungo balun bijo pun balun, mamintak sunggueh pado Alloh, kok dapek anak katurunan ka panyambuang kasieh jo sayang. Barakek doa dikabulkan Alloh, nan bak bida-bida urang dahulu, nan bak andai andai urang kini. Nak ulam pucuek manjulai, nak aie pincuran tabik, nak licin kilek lah tibo. Angin nan barasa limbago hujan nan bapuhun, pado mulak mulonyo, sajak sahari dalam rahim, sambilan bulan dalam kandungan, duo tahun arek manyusu, limo musim dalam pangkuan. Lah runtueh bahu malenggokkan, lah parau suaro mandendangkan, jo dendang mangko takalok. Oi nak kanduang lakeh lah gadang, katungkek di kalo lamah ka tolong di maso tuo. Lah gadang anak mande kini, tapi malang mande baranak, kain pandukuang alun baganti, utang panyambue alun lansai, aie susu tabaleh tido, usah di bari inyo barutang, pado Allah mohonkan baleh, untuang ka jadi amal saleh. Ka unduang-unduang di akhirat ka payuang panji ka sarugo, ampun kan diri anak mandeh, jo doa utang inyo ansue. Kok diukue di batang tubueh, dietoang umue nan tapakai, kini lah tibo kutikonyo. Talayang pandang ka nan jaueh tatukiek pandang ka nan dakek, lakek pandang ka nan surang. Kan lah disamporonokan pulo dek angku guru kito, barupo nikah nan berwali, ijab dengan kabul. Baa sawajah kini nagko, kan iyo ka malapeh marapulai namonyo, mah tuan. Dang lah dipatamukan Allah kaduo urang nangko, baruntuang lah andaknyo. Samo dimintakkan pado Allah, saiyo sakato, salangkah sapajatian, ka ilie sarangkueh dayuang, ka mudiek sarantak galah. Jikok takacak manggaleh baniago, tabali di nan murah, tajua di nan maha juo handaknyo. bak Nabi pulang baniago. Santano bakarajo jadi pagawai, pangkek naiek gaji batambah, nak manjadi keluarga sakinah, mawaddah wa rahmah. Di kaue ambo kok lupo, tuan alim kan tau ingek, fatihah sajo manyampaikan. Durian di tangah padang Kulik nan mintak di kampuangkan Kumayan ka ambo panggang Doa nan mintak diaminkan, mah tuan ..... Dari aue ka pulau paco Birah talingonyo Angek Di birah sajo urang ampaikan. Di kaue ambo kok talupo Alim pandito kan lai tau ingek, Patiah sajo manyampaikan. Titah nak bapuhun ka bakeh Datuak, mah Datuak ....... Ujuang : Lah ukue sampai Datuak .... Pangka : Bilang Sakiro itu lah Datuak .... Ujuang : Ban pulo tu mah Datuak sapanjang panitahan Datuak nan ka tangah, jikok di Datuak lah bairik barantang panjang, sabarih tiado lupo, satitiek tiado hilang, hilang bana curiang di batu, lukisan limbago kan lai tingga juo. disinan kan takana pulo dek rawi urang tuo kito, apolah nan manjadi rawi dek urang tuo kito : Anak alang ateh cilabuak Manyemba lalu ka udaro Buyieh manyemba siba baju Ka rimbo bakarek rotan Tarampai lalu tangah jalan Panggang lah kumayan dek Datuak Nak mandoa angku guru kito Bulieh manampuang si alek jamu Molah basamo kito aminkan Nak nyo sampai niek sapangkalan, mah Datuak ...... Pangka : Lah ukue sampai Datuak .... Ujuang : Bilang Sakiro itu lah Datuak .... Pangka : Tiok guguek kan lai ba balam mau, tiok lasuang lai ba ayam gadang. Mamintak sungueh sipangkalan bakeh Datuak, Datuak bana mambacokan doa salamek mah Datuak ..... Ujuang : Lah ukue sampai Datuak .... Pangka : Bilang Sakiro itu lah Datuak .... Ujuang : Panjang bana rueh ka ujuang, di pangka juo tabu nan manih mah Datuak ..... Pangka : Eh .... ndak lai doh Datuak, ka bajolak ka bajolai bana di sinan juo ka tibonyo. Basisuruik Datuak salangkah, bakisa ambo satapak, sarahkan ayam ka juaro, pulangkan kaji ka tuan alim, samo kito mintakkan ka urang pandai mah Datuak ..... Ujuang : Baitu molah Datuak ...... Dimohonkan kepada ustad untuk menbacakan doa Bersambung ... Note : Pidato pasambahan Manjapuik marapulai, disusun oleh kawan-kawan di "Kacimpuang pamenan Mandi" di bawah arahan Halvi Hamid Mangkoto Sati, yang anggotanyo terdiri dari anak Nagari Muaropaneh Kabupaten Solok nan ado di Jakarta dan sekitarnyo. Naskah ini telah beberapa kali dikaoan (dipraktekkan) dalam acara manjapuik marapaulai manjalang baralek di gedung atau di aula. Diharapkan naskah ini dapat membantu memberikan arah dalam acara pidato pasambahan. Semoga bermanfaat. sumber:http://www.cimbuak.net | |
|
| |
| Total comments: 0 | |